កងរាជឣាវុធហត្ថខេត្តបន្ទាយមានជ័យ បញ្ជូនខ្លួនជនសង្ស័យ២នាក់ ទៅតុលាការ ពាក់ព័ន្ធករណី លួចសម្ភារៈ និងប្រើប្រាស់ដោយខុសច្បាប់នូវសារធាតុញៀន
September 29, 2026
(បន្ទាយមានជ័យ)៖ កម្លាំងជំនាញមូលដ្ឋានកងរាជអាវុធហត្ថស្រុកម៉ាឡៃ បានទទួលបណ្ដឹងបន្ទាន់របស់ជនរងគ្រោះឈ្មោះ ថៃ ម៉េងលី ភេទប្រុស អាយុ២៨ឆ្នាំ ស្នាក់នៅភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ តំណាងឱ្យក្រុមហ៊ុនប៉ាងណាគ្រីគ្រុប ស្តីពីករណីលួចសម្ភារៈនៅក្នុងក្រុមហ៊ុន កាលពីវេលាម៉ោង២៣និង២៣នាទី ថ្ងៃទី២៧ ខែកញ្ញា ឆ្នាំ២០២៦ បង្កដោយជនសង្ស័យមួយក្រុម ហើយត្រូវបានសន្តិសុខយាមនៅទីនោះឃាត់ខ្លួនបានចំនួន០២នាក់ ចំណែកបក្ខពួកផ្សេងទៀតបានរត់គេចខ្លួន។
ក្រោយពីទទួលបានបណ្ដឹងរាយការណ៍ខាងលើលោកវរសេនីយ៍ត្រី តាំង សុខហេង មេបញ្ជាការមូលដ្ឋានកងរាជអាវុធហត្ថស្រុកម៉ាឡៃ បានដឹកនាំកម្លាំងជំនាញមូលដ្ឋានចុះដល់ទីតាំងកើតហេតុ ហើយនាំខ្លួនសង្ស័យចំនួន០២នាក់ ១-ឈ្មោះ នួន សុខសម្បត្តិ ភេទប្រុស អាយុ៤១ឆ្នាំ, ២-ឈ្មោះ សុខ វឌ្ឍនា ភេទប្រុស អាយុ២៩ឆ្នាំ រួមទាំងដកហូតវត្ថុតាងប្រព្រឹត្តបទល្មើសមានដូចជា ម៉ូតូសណ្តោងរ៉ឺម៉កចំនួន២គ្រឿង រួចនាំមកកាន់មូលដ្ឋានកងរាជអាវុធហត្ថស្រុកដើម្បីសួរនាំ ព្រមទាំងបានធ្វើតេស្តទឹកនោមរកឃើញមានសារធាតុញៀនវិជ្ជមាន(+) ម្នាក់ឈ្មោះសុខវឌ្ឍនា។
លោកវរសេនីយ៍ត្រី តាំង សុខហេង មេបញ្ជាការមូលដ្ឋានកងរាជអាវុធហត្ថស្រុកបានឱ្យដឹងថា ក្រោយឃាត់ខ្លួននិងសួរនាំរួច ជនសង្ស័យបានឆ្លើយសារភាពថា ពួកខ្លួនពិតជាបានចូលលួចសម្ភារៈរបស់ក្រុកហ៊ុនខាងលើ និងបានប្រើប្រាស់ដោយខុសច្បាប់នូវសារធាតុញៀនពិតប្រាកដមែន។ លោកវរសេនីយ៍ត្រី តាំង សុខហេង បានបញ្ជាក់ថា ជនសង្ស័យទាំង០២នាក់នេះ គឺជាមុខសញ្ញាលួចយ៉ាងសកម្មក្នុងស្រុកម៉ាឡៃផផងដែរ។ ដោយផ្អែកលើចម្លើយសារភាព និងមានវត្ថុតាងជាក់ស្តែងកម្លាំងមូលដ្ឋានកងរាជអាវុធហត្ថស្រុកម៉ាឡៃ កសាងសំណុំរឿងបញ្ជូនទៅកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មើសបានឱ្យដឹងថា បច្ចុប្បន្ន ជនសង្ស័យទាំងពីរនាក់ ត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅព្រឹកថ្ងៃអង្គារ ទី២៩ ខែកញ្ញា ឆ្នាំ២០២៦នេះ ដើម្បីអនុវត្តតាមនីតិវិធី៕
